Пошук
Пра газету "Царква"
«ЦАРКВА» — беларуская рэлігійная культурна-асьветніцкая газета.

Газета асьвятляе жыцьцё грэка-каталіцкіх супольнасьцяў у Беларусі і ў іншых краінах сьвету, зьмяшчае афіцыйныя дакументы Царквы, удзяляе ўвагу праблемам экуменізму і хрысьціянскай еднасьці, друкуе матэрыялы па гісторыі Ўніяцкай Царквы і іншую рэлігійна-асьветніцкую інфармацыю.

Выдавец: Грэка-каталiцкая парафія сьвятых братоў-апосталаў Пятра і Андрэя ў г. Берасьці

Галоўны рэдактар: а. Ігар Кандрацьеў

Выпускны рэдактар: Ігар Бараноўскі

Адказны рэдактар: а. Андрэй Крот, STL

Беларуская грэка-каталіцкая газета «Царква» была заснавана менскімі грэка-каталіцкімі парафіямі ў 1995 годзе. Першы нумар газеты выйшаў на Вялікі пост, 20 сакавіка 1995 году. Рэдакцыя тады месьцілася ў Полацку, а першым галоўным рэдактарам газеты быў ераманах Валеры Алексійчук (з 1999 г. — ераманах Бенядыкт, ігумен Сьвята-Ўсьпенскай Уніўскай Лаўры; на пачатку верасьня 2010 г. хіратанізаваны на дапаможнага біскупа Львоўскай архіяпархіі УГКЦ). Над выпускам першых шасьці нумароў газеты (да сяр. 1996 г.) працавала менская моладзь і супрацоўнікі выдавецтва «Унія».

Пачынаючы з Вялікадня 1996 году, ад сьпецвыпуску газеты № 7-8, прысьвечанага 400-гадоваму юбілею Берасьцейскай Уніі, газета «Царква» ствараецца ў Берасьці намаганьнямі вернікаў мясцовай парафіі сьвятых братоў-апосталаў Пятра і Андрэя, а з 27 лістапада 1997 году, пасьля перарэгістрацыі друкаванага выданьня, берасьцейская грэка-каталіцкая парафія стала таксама заснавальнікам і выдаўцом газеты «Царква».

Газета «Царква» выходзіла раз на квартал, яе заўсёды можна было набыць ва ўсіх грэка-каталіцкіх парафіях і асяродках Беларусі, а таксама ў многіх рыма-каталіцкіх касьцёлах. Ад моманту заснаваньня газеты на яе можна было таксама падпісацца праз каталог «Белпошты» ў любым аддзяленьні сувязі Беларусі. Шмат асобнікаў газеты «Царква» рэгулярна дасылалася ў розныя гарады і краіны сьвету нашым чытачам, вернікам і сябрам Беларускай Грэка-Каталіцкай Царквы, якія жывуць у Польшчы, Украіне, Расеі, Бельгіі, Вялікабрытаніі, ЗША, Канадзе, Італіі, Чэхіі, Нямеччыне.

Наклад газеты за часы яе існаваньня ў сярэднім складаў 1500-2500 асобнікаў, аднак адзін з першых нумароў газеты і нумары, што выйшлі ў канцы 2006 году, мелі наклад да 7500 асобнікаў. У 2007-2009 гадах газета «Царква» выдавалася накладам 2500-4000 асобнікаў.

Да 2011 году было выдадзена 65 нумароў газеты «Царква». З сярэдзіны 2010 году існуе толькі як інтэрнэт-выданьне.

Наш разьліковы рахунак для ахвяраваньняў:

№ 3015220710013 у ЦБУ ЗАТ «Абсалютбанк» у г.Берасьці, МФО 153001898, УНП 200558013

Закрыць