Пошук
Сьвятло Ўсходу
02.11.2014
Ярархі Ўсходніх Каталіцкіх Цэркваў: разьдзяленьне Царквы Хрыстовай — анамалія, якую нельга лічыць нормай жыцьця
 
23-26 кастрычніка ў Львове адбылася штогадовая Сустрэча ўсходніх каталіцкіх ярархаў Еўропы, падчас якой абмяркоўвалася місія і роля Ўсходніх Каталіцкіх Цэркваў у экуменічным дыялогу. Па яе завяршэньні біскупы прынялі Зварот, у якім, у прыватнасьці, адзначылі ўклад Усходніх Каталіцкіх Цэркваў у справу экуменізму.
 
Мы, біскупы, якія прадстаўляем розныя памесныя Цэрквы Еўропы, сабраліся ў Львове (Украіна) 23-26 кастрычніка 2014 году, каб задумацца і паразважаць над тэмай місіі Усходніх Каталіцкіх Цэркваў праз 50 гадоў пасьля абвяшчэньня саборных дэкрэтаў “Orientalium Ecclesiarum” і “Unitatis Redintegratio” і ў 25-ю гадавіну легалізацыі Ўкраінскай Грэка-Каталіцкай Царквы. Напрыканцы нашай сустрэчы мы хочам падзяліцца некаторымі думкамі.
Удзельнікі Сустрэчы ярархаў усходніх Каталіцкіх Цэркваў Еўропы ў Львове.
Роля і ўклад Усходніх Каталіцкіх Цэркваў у справу экуменізму
 
На аснове саборнага рашэньня, якім выказваецца пастырскі клопат Каталіцкай Царквы адносна разьвіцьця Ўсходніх Каталіцкіх Цэркваў з заклікам працаваць для іх далейшага росквіту з новым апостальскім запалам дзеля выкананьня ўскладзенай на іх місіі (пар. Orientalium Ecclesiarum, 1),
 
— мы з поўным усьведамленьнем пацьвярджаем нашае права і абавязак на зьдзяйсьненьне душпастырскай апекі ў адносінах нашых вернікаў, дзе б яны не былі, у тым ліку нашае права абвяшчаць Евангельле ўсім тым, хто гэтага яшчэ ня ведае;
 
— выказваем нашае брацкае пажаданьне, каб і Праваслаўныя Цэрквы ажыцьцяўлялі ў любові і ісьціне тую місію, якую даручыў ім Гасподзь;
 
— вызнаем таксама і за Праваслаўнымі Цэрквамі права рупіцца аб ажыцьцяўленьні душпастырскага клопату адносна іх вернікаў ва ўсім сьвеце, без усялякага антаганізму і з поўнай павагаю да права свабоды рэлігійнага вызнаньня;
 
— сьцьвярджаем, што разьдзяленьне адзінай Царквы Хрыстовай зьяўляецца сапраўднай эклезіялагічнай анамаліяй, якую ні пры якіх абставінах нельга лічыць нормай жыцьця і місіі Царквы;
 
— падзяляем разам з Праваслаўнымі Цэрквамі заклапочанасьць адносна наяўных тэндэнцыяў у культурнай і сацыяльнай сферы жыцьця чалавецтва, якія вядуць да паступовай дэхрысьціянізацыі і секулярызацыі Еўропы;
 
— мы перакананыя ў сваім пакліканьні да адказнасьці, каб заклік Хрыста да еднасьці Яго Царквы стаў адным з найбольш прыярытэтных, неадкладных і абавязковых вымярэньняў ідэнтычнасьці Ўсходніх Каталіцкіх Цэркваў, незважаючы на ўсе цяжкасьці і перашкоды на шляху экуменізму;
 
— нагадваем пра жаданьне Ўсходніх Каталіцкіх Цэркваў быць максімальна задзейнічанымі ў справе вядзеньня дыялогу праўды і любові паміж Каталіцкай і Праваслаўнымі Цэрквамі.
 
Сітуацыя на Блізкім Усходзе
 
Драматычная сітуацыя хрысьціянаў на Блізкім Усходзе ды іншых рэлігійных і этнічных меншасьцяў, якія пакутуюць ад гвалту, што пануе ў гэтым рэгіёне, стала прадметам нашага глыбокага роздуму і малітвы. Мы запэўніваем мясцовых душпастыраў і іх вернікаў у нашай падтрымцы і салідарнасьці, нагадваем усім, што мір і згода на Блізкім Усходзе ня зьявяцца без выразнай і адназначнай рэакцыі з боку міжнароднай грамадзкасьці і такога яе ўплыву на абодва бакі канфлікту, які быў бы накіраваны на забесьпячэньне прынцыпаў рэлігійнай свабоды і свабоды сумленьня ды закладаў бы асьветніцкія падмуркі для належнага выхаваньня здольных весьці дыялог між сабой будучых пакаленьняў.
 
25-ыя ўгодкі легалізацыі Ўкраінскай Грэка-Каталіцкай Царквы
 
Мы прыехалі ва Ўкраіну таксама, каб разам адсьвяткаваць 25-ыя ўгодкі легалізацыі Ўкраінскай Грэка-Каталіцкай Царквы. Яе адраджэньне зьяўляецца выразнай дзеяй Божага Провіду, якая заахвочвае сёньня ўсю Царкву да грунтоўнага пераасэнсаваньня ўсяго таго, што адбываецца, да аднаўленьня духу місійнасьці ў справе абвяшчэньня Евангельля і да большай заангажаванасьці ў сферы сацыяльнага жыцьця грамадзтва ў адказ на новыя выклікі для душпастырства, якія спараджае цяперашняя сітуацыя ў краіне. Запэўніваем увесь украінскі народ у нашай з ім малітоўнай еднасьці, падтрымцы і салідарнасьці перад абліччам вайсковага супрацьстаяньня на Ўсходзе дзяржавы, якое дагэтуль трывае і суправаджаецца зьнешняй агрэсіяй, якая прыносіць вялікія пакуты, асабліва мірнаму насельніцтву. Запрашаем усіх неадкладна ўстаць на шлях міру і згоды.
 
Гэтыя ўгодкі мы глыбока перажылі ў малітве і Ахвяры Найсьвяцейшай Еўхарыстыі, выпрошваючы для ўсіх Божага блаславеньня і заступніцтва Найсьвяцейшай Багародзіцы — Маці Бога і Маці Царквы.

Пераклад на беларускую паводле CCEE.
Гл. таксама:
08.10.2018
Зьверхнік УГКЦ: «Экуменізм трэба забраць з рук дыпламатаў»
18.11.2016
Першаярарх УГКЦ сустрэўся з Рымскім Архірэем
12.02.2016
Прадстаўнік Папскай Рады па спрыяньні еднасьці хрысьціянаў пра сустрэчу Папы Рымскага і Маскоўскага Патрыярха
31.10.2014
Усходнія Каталіцкія Цэрквы павінны быць актыўнымі ўдзельнікамі дыялогу праўды і любові
26.06.2014
Зьверхнік УГКЦ праваслаўным расіянам: “Мы ня вашыя ворагі, мы вам браты ў Хрысьце”